حوزہ نیوز ایجنسی کی رپورٹ کے مطابق، ایران کے چیف جسٹس حجۃ الاسلام والمسلمین غلام حسین محسنی اژہای نے اقوام متحدہ کی جنرل اسمبلی میں صدر ایران مسعود پزشکیان کی تقریر کو باوقار اور قابلِ توجہ قرار دیتے ہوئے کہا ہے کہ انہوں نے مضبوط اور دوٹوک انداز میں ایرانی عوام کے حقوق کا دفاع کیا اور امریکی و صہیونی حکام کے جرائم کو دنیا کے سامنے بے نقاب کیا۔
ایران کے چیف جسٹس حجۃ الاسلام والمسلمین غلام حسین محسنی اژہای نے سوشل میڈیا پر اپنے پیغام میں صدر مسعود پزشکیان کی اقوام متحدہ کی جنرل اسمبلی میں تقریر پر ردِعمل ظاہر کیا۔
انہوں نے کہا کہ صدر پزشکیان کی اقوام متحدہ میں تقریر حقیقتاً اہم، قابلِ قدر اور عزت و وقار پر مبنی نکات سے بھرپور تھی۔
محسنی اژہای نے مزید کہا کہ پزشکیان نے رہبرِ شہید آیت اللہ خامنہای کی معنوی میراث کو سامنے رکھتے ہوئے مضبوط اور ثابت قدم انداز میں ایرانی عوام کے جائز حقوق کا دفاع کیا اور امریکی و صہیونی مجرموں کے جرائم کو دنیا کے سامنے بے نقاب کیا۔
انہوں نے کہا کہ آج ایرانی قوم کی انصاف طلبی کی آواز دنیا بھر کے آزاد انسانوں کے کانوں تک پہنچ رہی ہے۔
ایران کے چیف جسٹس نے اپنے بیان میں حالیہ جنگ اور ایران پر ہونے والے حملوں کا ذکر کرتے ہوئے کہا کہ یہ بات واضح ہے کہ امریکہ اور صہیونی حکومت نے ایران کے خلاف جارحیت کے دوران متعدد جنگی جرائم کا ارتکاب کیا۔
ان کے بقول، بین الاقوامی قوانین کے مطابق ایران کے خلاف جارحیت کا بنیادی اقدام بھی غیر قانونی اور ناجائز تھا اور اس جارحیت کے دوران کیے جانے والے جرائم بھی سنگین جنگی جرائم کے زمرے میں آتے ہیں۔
محسنی اژہای نے کہا کہ ایران کا عالمی برادری اور بین الاقوامی اداروں سے مطالبہ ہے، کیونکہ امریکہ اور صہیونی حکومت کی جانب سے ایرانی عوام کے خلاف کیے گئے متعدد جنگی جرائم کے باوجود ان اداروں نے خاموشی اور بے عملی اختیار کی۔
انہوں نے مزید کہا کہ بین الاقوامی ادارے اور انسانی حقوق کے نام پر کام کرنے والی تنظیمیں ایران کے عوام کے خلاف امریکہ اور اسرائیل کے جرائم پر اپنی آنکھیں بند کیے ہوئے ہیں۔
ایران کے چیف جسٹس نے اس بات پر زور دیا کہ ایرانی عوام اپنے حقوق کے دفاع اور حالیہ واقعات میں ہونے والے جرائم کے خلاف عالمی سطح پر انصاف کا مطالبہ کرتے رہیں گے۔
آپ کا تبصرہ